El diputáu de Podemos Asturies apoyó en Lluanco a les families de Gozón que quedaron ensin plaza nesi ciclu infantil

Enrique López pide a Adrián Barbón, secretariu xeneral de la FSA y candidatu nes primaries socialistes pa la presidencia del Principáu, «que-y diga a Javier Fernández que’l so Gobiernu tien que dar pasos concretos y dexase de palabrería coles escueles de cero a tres años». El diputáu del Grupu Parlamentariu de Podemos Asturies fizo eses declaraciones a los medios de comunicación esti miércoles delantre de la escuela La Canal, en Lluanco, onde amosó’l so apoyu a les families de Gozón a las que se-yos niega’l serviciu de cero a tres.

El parlamentariu de la formación morada esplicó que «el Gobiernu asturianu puede, a traviés d’una modificación presupuestaria, disponer de los recursos económicos necesarios p’atender toles demandes de places». Añadió que «agora dicen que d’equí al mes de xineru se va solucionar el problema de Gozón, pero a les families nun-yos val que se solucione en xineru, sinon que tien que tar solucionáu en setiembre, que ye cuando empieza’l cursu escolar».

Enrique López recordó que «cuando na negociación presupuestaria planteábemos al Gobiernu que la etapa educativa de cero a tres años yera un derechu y que lo qu’hai que facer ye atender esi derechu, dicíanos que la rede actual ye suficiente, que nun hai demanda como pa que queden families fuera. Pues resulta qu’equí ta la demanda ensin cubrir, y non sólo en Gozón, sinon en Cangues, en Llanes, en Xixón y n’otros conceyos onde munches families queden ensin poder matricular a les sos fíes y fíos nesa etapa educativa por falta de recursos». Asina les coses, el diputáu pide que «lo que’l PSOE defende de palabra, una enseñanza de cero a tres pública, universal y gratuita, se concrete con midíes. Nun val dicilo y dempués andar a saltu de mata a resultes de la presión de les families en cada conceyu».

Pela so parte, Silvia Menéndez, una de les madres afectaes en Gozón, dixo que «nos paez inconcebible que trenta y cinco families quedemos ensin poder llevar a los nuesos fíos a la guardería, ensin poder conciliar la vida familiar y llaboral». Comentó que «falamos col alcalde y diznos qu’a lo meyor en xineru se soluciona el problema. El Gobiernu quier que tengamos fíos, pero nun nos da nenguna ayuda».