Los grupos parlamentarios de Podemos Asturies y de Ciudadanos propunxeron esti llunes na Xunta de Portavoces de la cámara asturiana la tramitación a traviés del procedimientu d’urxencia de la proposición de llei de supresión d’aforamientos que «s’aprobó por tolos grupos el pasáu vienres nel plenu de la Xunta Xeneral pero’l PSOE bloqueó el consensu pa que se pudiera tramitar la primer toma en consideración que supón la modificación del Estatutu d’Autonomía, que puede reformase si hai voluntá política», esplicó Enrique López. El portavoz parlamentariu dixo a los medios de comunicación que «nun entendemos cuála ye la razón de la FSA pa querer posponer la supresión d’unos privilexos que se vienen manteniendo durante décades y que yá nun son almisibles pa la sociedá nin pa la mayoría de los grupos parlamentarios que representen a la ciudadanía».
Asinamesmo, el representante del partíu moráu anunció pal plenu d’esta semana tres iniciatives relacionaes cola educación, porque «cuando se ta planteando incluso la posibilidá de qu’Asturies pierda un diputáu nel Congresu respecto a les anteriores elecciones pola caída de la población creemos que ye necesario reforzar aspectos como la educación, que son los que pueden facer que la xente s’amarre al so territoriu y permitir la permanencia de les families moces na nuesa tierra». Concretó que «llevamos una iniciativa pol pieslle del colexu públicu Virgen de las Mareas d’Avilés, otra pa esixir soluciones inmediates a la situación del barriu uvieín de La Corredoaria, con un Institutu d’Educación Secundaria prometíu va yá cuatro años, y una iniciativa mui importante sobre la necesidá d’axilizar la concesión de les ayudes d’investigación, desarrollu y innovación». Na so opinión, «ye necesario non solo’l retornu del talentu, sinon tamién desarrollar toles midíes posibles pa que naide se marche d’Asturies».
