«Naide cree que nun tuviera al tantu de la financiación B del so partíu», diz el diputáu de Podemos Asturies al conocese la sentencia de la Gürtel

«Dende Podemos Asturies creemos que nengún otru país democráticu diba permitir qu’un dirixente políticu qu’apaez nos papeles d’una causa xudicial basada na financiación illegal del so partíu siguiera nel Gobiernu nin un minutu más», afirmó esti xueves Enrique López nos pasiellos de la Xunta Xeneral al conocese la sentencia del casu Gürtel. El diputáu dixo que «naide nesti país cree que Mariano Rajoy nun tuviera al tantu de que’l so partíu taba financiándose con una caxa B mediante l’amañu de contratos públicos».

El parlamentariu de la formación morada considera que «la sentencia contundente de la trama Gürtel tien que suponer un enantes y un dempués a la hora d’asumir les responsabilidaes polítiques» y dexa claro que «nun tamos falando d’un casu aisláu, hai pendientes de xuiciu más de sesenta nos que ta implicáu’l PP. Esti fue solo ún d’ellos». Añade que «la ciudadanía nun tien que sopotar por más tiempu qu’una organización definida pola Unidá de Delincuencia Económica y Fiscal (UDEF) de la Policía como una estructura pa delinquir siga na impunidá absoluta y que naide quiera asumir responsabilidaes».

Enrique López recuerda sobre’l presidente del Executivu español que «cuando socedieron los fechos encausaos yá formaba parte de la dirección del partíu y apaez nos papeles de Luis Bárcenas». Asina les coses, conclúi, «ye obligao esixir la dimisión inmediata de Rajoy, porque nun podemos tener como presidente del Gobiernu al dirixente d’un partíu que fue financiáu amañando contratos durante más d’una década».