El partíu moráu pide na xunta de portavoces del Parlamentu asturianu que se suspenda’l plenu previstu pal Día de la Muyer
Enrique López anunció esti llunes a los medios de comunicación, al acabar la reunión de la xunta de portavoces del Parlamentu asturianu, que «el nuestru grupu planteó que nun haya plenu’l 8 de marzu, vienres. Les diputaes y diputaos de Podemos Asturies vamos facer fuelga esi día solidarizándonos cola convocatoria estatal y internacional de fuelga feminista pa dexar clara la nuestra sintonía total coles reivindicaciones que nella se planteen y qu’afecten a tola sociedá». La xunta de portavoces ha de tomar una decisión sobre esti asuntu na próxima reunión, el llunes de la selmana qu’entra.
El portavoz parlamentariu del partíu moráu tamién informó de que «na reunión d’esta mañana surdió un alderique respecto a la proposición de llei presentada por dos grupos parlamentarios, ente ellos el nuestru, sobre los aforamientos». Detalló que «paez que se cai l’apoyu a la proposición del Grupu Popular, qu’argumenta que los plazos yá son muy curtios. Nun val pronunciase públicamente a favor de la supresión de los aforamientos pa cargos públicos y dempués, cuando llega’l momentu de la verdá y hai que dar pasos concretos pa que n’Asturies se reforme un apartáu d’un artículu del Estatutu d’Autonomía, resulta qu’empiecen a poner problemes».
Sobre esti asuntu, Enrique López considera que «ye bono que la ciudadanía sepa quiénes dicen les coses namás de cara a la galería y quiénes tán dispuestos a llegar hasta les últimes consecuencies pa remocicar les lleis naquelles cuestiones sustanciales que creemos qu’importen a la ciudadanía y que son de xusticia porque ponen al mesmu nivel los derechos de los representantes públicos y los de la xente».
Asinamemos, na xunta de portavoces d’ayeri se faló de los plenos que queden hasta’l final de la llexislatura y ehí «el nuestru grupu insistió na necesidá d’agotar el plazu que l’Estatutu d’Autonomía establez enantes de la convocatoria d’elecciones y celebrar l’últimu plenu’l día 29 de marzu». Esplicó que «ye una decisión que tovía nun ta tomada y sabemos que la intención nun yera esa por parte de dalgunos de los grupos de la cámara. Hai qu’aprovechar el tiempu al máximo, porque hai trabayu llexislativu pendiente y tamién los dictámenes de dos comisiones d’investigación que lleven trabayando munchos meses».
Per otru llau, el portavoz parlamentariu informó de que «Podemos Asturies treslladó al restu de grupos una propuesta de declaración institucional pa conmemorar el Día Internacional de la Llingua Materna, que se celebró la selmana pasada. De les cerca de 6.000 llingües qu’hai nel planeta, según datos de la UNESCO aproximadamente la metá tán en peligru d’estinción, ente elles l’asturianu y el gallego-asturiano». Por ello, añadió, «creemos que ye’l momentu de posicionase dende’l Parlamentu asturianu pa protexer esti bien inmaterial, la riqueza que supón contar con una llingua materna que falamos munchos miles d’asturianes y asturianos y que convive pacíficamente col castellanu».
