Enrique López, visitó ayeri a los trabayadores de Montrasa que permanecen zarraos dende va ocho díes nes instalaciones d’Alcoa n’Avilés. López, que tuvo acompañáu por Lorena Gil y la concejala de Somos Avilés, Yolanda Suárez, treslladó’l sofitu de Podemos a los trabayadores de Montrasa, que decidieron allegase a la vía xudicial pa esixir la so integración na plantiya de l’aluminera o, nel so defeutu, el so reallugamientu n’otres empreses auxiliares.
Enrique criticó que lo que ta asocediendo con estos trabayadores ye “un exemplu más de lo qu’asocede n’Asturies. Ye un casu más que se vien repitiendo nos últimos años y tou va nuna mesma llínea, que nun ye otra que la progresiva destrucción del texíu industrial y de l’actividá productiva n’Asturies”.
Enrique López recordó que cuando Podemos Asturies plantega nel Parlamentu a Javier Fernández, que’l Gobiernu tien d’actuar contra estes multinacionales pa evitar los abusos que se tán produciendo, resulta que “de lo que se fala ye de la llibertá de mercáu”. Nesi sentíu, destacó que dende Podemos nun tamos acordies con les decisiones que se tán tomando y convidó al Executivu socialista “a ser más batallosu”, porque “el texíu industrial asturianu ta destruyéndose y echando a muncha xente a la cai. Nun se tán respetando les condiciones llaborales de los trabayadores.” Amás criticó que les multinacionales ven n’Asturies “una barra llibre” p’actuar como quieran, coles mesmes qu’emplazó al Gobiernu a asumir la responsabilidá que tien con esta comunidá autónoma.
A lo último, López adelantró que darréu van esixi-y al conseyeru d’Industria que medie con Alcoa y faiga respetar los alcuerdos roblaos “porque hai 34 puestos de trabayu en peligru y unos trabayadores a los que-yos sofita la razón”. Podemos va obligar al Gobiernu, dende’l puntu de vista institucional y políticu, “a qu’asuma’l so papel”.
