El portavoz de Podemos Asturies diz que «queda marxe pa la negociación, pero vamos tener que movenos con axilidá»
Enrique López dixo esti xueves a los medios de comunicación, sobre la reunión del pasáu miércoles en materia presupuestaria col Gobiernu y la FSA, que «hebo algunos avances, pero mantiénense diferencies importantes en temes que pa Podemos Asturies son centrales». Dexó claro que «el Gobiernu ha de facer un esfuerzu mayor p’abordar un acuerdu presupuestariu en cuestiones importantes pa la sociedá asturiana, como son les llistes d’espera sanitaries, la estensión de la rede pública d’escueles de cero a tres o la reducción de les tases universitaries».
El portavoz parlamentariu de la formación morada detalló que la reducción de tases «ye una demanda de la comunidá educativa en tol país y güei mesmo’l rector posiciónase apoyando la propuesta que treslladamos al Gobiernu». No que cinca al ciclu educativu de cero a tres años, recordó que «n’otres comunidaes autónomes el PSOE ta apostando dafechu pola estensión y gratuidá de la rede. Tamos falando d’un cambiu que tien una incidencia demográfica importante y pretendemos que se sitúe como un elementu central». Sobre les llistes d’espera sanitaries, apuntó que «siguen mui altes, con munchísima xente pendiente d’elles, y el Gobiernu tampoco nos dio una respuesta afayadaiza».
Enrique López considera que «queda marxe tovía pa la negociación, pal avance, pero vamos tener que movenos con rapidez, con axilidá. Pola nuestra parte ye absoluta la disposición pa llegar a un acuerdu. Agora bien, el Gobiernu tien que facer un esfuerzu, porque la conclusión de la reunión d’ayeri ye que la respuesta que dio a les nuestres propuestes centrales ye claramente insuficiente». Informó de que «acabo de requerir a la conseyera de Facienda que nos unvie los documentos que falten, son necesarios pa poder facer un análisis rigurosu. Les propuestes tienen qu’acompañase con documentos y los compromisos tienen qu’acompañase con testos y cifres».
