«Vamos esixir que solucione l’estáu d’abandonu de la rede de l’antigua Feve», señala’l portavoz parlamentariu de Podemos Asturies
Enrique López señaló esti miércoles, en rempuesta a la noticia de que la interrupción del tráficu ferroviariu con Bilbao por mor del temporal de lluvia afectó non solo al tresporte de viaxeros sinon tamién al de mercancíes d’industries como Arcelor, que «yá valió de soportar l’abandonu al qu’Adif tien sometida a Asturies. Los cortes de la vía ferroviaria nun son nuevos, equí tamién llueve sobre moyao. Y nun afecten solo a la ciudadanía, tamién a la industria». El portavoz del Grupu Parlamentariu de Podemos Asturies alvierte de que «se ta destrozando’l tresporte ferroviariu, hubo una dexadez absoluta por parte del Gobiernu anterior de Mariano Rajoy, pero tamién del Executivu de Pedro Sánchez, que nos meses que lleva nun fizo nada n’absoluto por meyorar la situación caótica y tercermundista que tienen nesti momentu les comunicaciones ferroviaries n’Asturies».
El representante de la formación morada dexó claro que «lo que vamos esixir al Gobiernu de Pedro Sánchez ye que ponga en marcha yá los mecanismos necesarios pa solucionar l’estáu d’abandonu en qu’Adif tien a la rede de l’antigua Feve n’Asturies». Recalca que «ye una situación insostenible y con ella lo que demuestren, tanto’l PP primero como agora’l PSOE, ye que nun-yos interesa dar solución a los problemes de los asturianos y les asturianes».
