Una proposición non de llei relacionada cola brecha salarial ente homes y muyeres ta ente les iniciatives que’l Grupu Parlamentariu de Podemos Asturies va llevar al plenu de la Xunta Xeneral el viernes, según anunció Emilio León esti llunes a los medios de comunicación. El portavoz de la formación morada diz que «una llectura profunda del últimu informe del CIS amuesa que les muyeres tienen una visión muncho más pesimista de la reactivación económica y mayor esmolecimientu pola sostenibilidá de los bienes y servicios más apegaos a la ciudadanía. L’axenda política a día de güei nun ta respondiendo a les demandes de las muyeres».
El portavoz parlamentariu de Podemos Asturies afirma que «sobren motivos pa la fuelga xeneral del Ocho de Marzu»
Recordó que n’Asturies tenemos la brecha salarial «más alta d’España en términos de salariu bruto y una grieta nes pensiones, onde les diferencies ente homes y muyeres pueden llegar hasta’l 90%. Por ello, sobren motivos pa la fuelga feminista que se ta plantiando pal próximu Ocho de Marzu». Refiríose tamién al casu de les trabayadores de la empresa Modultec, «que recurrieron a la famosa ventanilla única del Gobiernu pero siguen esperando que se tome dalgún tipu de midida dende la inspección llaboral y dende un Gobiernu que concedió subvenciones a esta empresa pa la contratación de muyeres que llueu fueron les primeres despidíes al aplicar un ERE».
Emilio León anunció, asinamesmo, que na sesión de control d’esta semana nel Parlamentu asturianu «vamos presentar una interpelación sobre la situación de la educación. Queremos saber qué asocede seis años dempués de qu’empezaran los recortes continuos, cuálu ye’l plan del Gobiernu asturianu pa recuperar les condiciones llaborales del profesoráu y la calidá educativa que se fue perdiendo progresivamente».
Otru asuntu que Podemos Asturies va llevar a la sesión plenaria de la cámara ye «una pregunta relacionada coles dificultaes poles que tán atravesando los trabayadores de les mines de Carbonar, Astur Leonesa y en xeneral del sector estractivu del carbón nuna zona a la espera del plan del Suroccidente, que sigue ensin ser tramitáu». Amás, «vamos a preguntar sobre la situación de la ganadería estensiva. Insistimos en que la recuperación del sector primariu va más allá d’aplicar a raxatabla les polítiques y consignes de la PAC, trátase d’integrar la ganadería y la producción agropecuaria nuna visión de conxuntu acerca del modelu productivu que necesita Asturies».
