Emilio León señaló en declaraciones a los medios de comunicación qu’esti xueves, Ocho de Marzu, «va celebrase un día históricu, d’esos que van facer que cambie la forma en que miremos al país. Quiciaes les nueses mentes seyan un poquitín más moraes dempués d’esa fuelga feminista». El portavoz del Grupu Parlamentariu de Podemos Asturies anunció que’l vienres, na sesión d’orientación de la Xunta Xeneral, «vamos llevar una iniciativa pa que los servicios xurídicos del Principáu se presenten d’oficiu naquellos casos en que pueda haber discriminación ente homes y muyeres, pensando principalmente en casos de discriminación llaboral como’l de les muyeres de Modultec». Recordó que «tres de les siete demandes presentaes na ventanilla única del Principáu contra la brecha llaboral son de muyeres de Modultec y nun tuvieron respaldu de l’Alministración».
Podemos Asturies va llevar al plenu una iniciativa pa que los servicios xurídicos del Principáu se presenten d’oficiu en casos de discriminación
Emilio León ve na del Ocho del Marzu «la primer fuelga que ye un ésitu enantes de que llegue’l día, porque la convocatoria ta abriendo alderiques que taben amatagaos, que nun alquirieran protagonismu. Les muyeres dixeron basta, yá nun se puede tar soportando una brecha salarial que fai que trabayen de media 54 díes al añu de baldre en comparación colos sos compañeros, que les sos pensiones valgan la metá, que tengan que sufrir situaciones d’acosu y de desigualdá…».
Añadió que «dende’l nuesu puntu de vista, y por eso apoyamos lóxicamente la suspensión del plenu d’esti xueves, les instituciones tienen que visibilizar esti tipu de situaciones. Aquellos que nenguneaben midíes d’acción positiva, como les llistes electorales cremallera, agora danse cuenta de que los nuesos parlamentos, les nueses instituciones, son muncho más plurales. Vamos demostrar qu’otres midíes pa lluchar contra la brecha salarial tamién contribúin a la igualdá y van facer qu’esti país cambie». Na so opinión, «los gobiernos pueden actuar de manera muncho más decidida, tienen que tomar midíes. Hai que respaldar non solo la movilización del xueves».
El portavoz parlamentariu anunció, asinamesmo, que les diputaes y diputaos de Podemos Asturies «vamos donar el nuesu salariu d’esi día a les organizaciones que tán promoviendo esta movilización».
