El portavoz parlamentariu y les diputaes Paula Valero y Lorena Gil participaron nel alcuentru ‘Un parque pa vivilu’, celebráu en Cangues
Optimismu no que cinca al presente y futuru, necesidá de cambios na so xestión y mecanismos de participación ciudadana na toma de decisiones. Con eses tres claves dio Emilio León esti sábadu la so visión del Parque Nacional de los Picos d’Europa. El portavoz del Grupu Parlamentariu de Podemos Asturies, que participó coles diputaes Paula Valero y Lorena Gil nel alcuentru ‘Un parque pa vivilu’, desarrolláu na Casa de Cultura de Cangues d’Onís, llamentó, respecto a esi espaciu natural protexíu, que «n’ocasiones vemos que se torga la participación ciudadana y cuando se faen apuestes pa meyorar el funcionamientu y l’usu se ponen tolos pilancos del mundu, mientres se pon l’alfombra colorada pa que, en cuenta d’afrontar los problemes y buscar soluciones, dalgún conceyu salga d’esi ámbitu de xestión».
El diputáu del partíu moráu añadió que «cuando un restaurante nun funciona bien hai dos opciones: pesllalu o meyorar el menú. Creemos que’l parque necesita meyorar lo qu’ofrez a los conceyos que formen parte de él, a los usuarios y por descontao al conxuntu d’Asturies. Esa ye l’apuesta principal, y a partir d’ehí que la ciudadanía, tando informada, tome la decisión que correspuenda, pero a sabiendes de qu’hai alternatives pal usu y xestión d’anguaño». Dixo que «vemos la situación con munchu más optimismu del que suel treslladar l’Alministración. Non solo tenemos la perspectiva d’un sieglu d’esistencia del Parque Nacional, sinon tamién la oportunidá de remocicar la so xestión y usu, y esi ye’l momentu nel que tol mundu ha de sentir que tien sitiu, que se puede vivir con arguyu nesti parque nacional ensin que naide se sienta excluío». Añadió que «s’usaron munches fórmules dende una visión más aristocrática, dende una xestión más burocrática, y agora toca probar xusto la que se dexó fuera, que ye la qu’apuesta pola integración cultural, por un mou de vida nel que naide se sienta excluío».
Nes distintes meses redondes del alcuentru, organizáu por Podemos Asturies, intervinieron, ente otres persones, la eurodiputada asturiana Estefanía Torres; José Carbonell, conceyal de Cangues Puede, y dellos especialistes en representación del sector turísticu, l’agroganadería, la investigación científica y les alministraciones públiques, procedentes de Cantabria, Galicia, Euskadi, Castiella y Lleón y Asturies.
