El llabor del conseyeru ta «mui lloñe» de ser satisfactoriu, diz el portavoz parlamentariu na Asamblea Social d’Educación de Xixón
Un conseyeru incapaz d’ufrir soluciones pa los problemes heredaos de la so predecesora nel cargu y pa los problemes nuevos que se tán xenerando baxo la so xestión. Asina valora Emilio León al titular d’Educación y Cultura, Genaro Alonso. El portavoz del Grupu Parlamentariu de Podemos Asturies, qu’esti sábadu participó col tamién diputáu Héctor Piernavieja na Asamblea Social d’Educación organizada nel Centru Municipal Integráu Xixón Sur, señala que, nel ecuador yá de la presente lexislatura, «el llabor de Genaro Alonso ta mui lloñe de satisfacer les espectatives. Sigue la inercia d’un Gobiernu como’l de Javier Fernández, incapaz d’introducir nengún cambiu de rumbu a pesar de los resultaos internos nel so partíu».
El portavoz parlamentariu llamenta qu’Alonso «non solo nun respondió a les necesidaes de la comunidá educativa nin iguó los problemes heredaos de la conseyera anterior, sinon que con él s’agrandaron les dificultaes y la insatisfacción pol incumplimientu de promeses. Nin los barrios uvieínos de La Corredoria y La Florida van tener los sos institutos cuando los prometieran, nin les educadores de cero a tres años van vese integraes na Conseyería d’Educación, nin los pas y mas van poder siquiera disfrutar de servicios básicos de comedores polos que tienen que tar peleando tovía a final de cursu».
Emilio León anuncia un nuevu ciclu que va entamar nes urnes, al asegurar que «falten dos años pa poder poner enriba de la mesa les prioridaes y les midíes que vamos adoptar cuando seya posible introducir un cambiu de polítiques, pero yá tamos viendo avances de lo que se puede facer colos recursos esistentes, como ye’l casu del Ayuntamientu d’Uviéu, qu’acaba d’incrementar en 84.000 euros la partida económica destinada a llibros de testu». Na so opinión, «n’Asturies hai recursos suficientes, asina como profesionales y pas y mas comprometíos cola educación de les fíes y fíos, como pa que les coses seyan d’una manera bien distinta a como vienen siendo».
Pol so llau, Cristina Blanco Rabanedo, responsable d’Educación del Conseyu Ciudadanu de Podemos Asturies, apunta que los dos oxetivos de l’Asamblea Social de Educación son «determinar les idees globales sobre’l modelu educativu pa establecer un ideariu y poder repensar la educación que queremos, y facer aportaciones concretes sobre aspectos d’interés que pudieran llevar a actuaciones nel ámbitu políticu más inmediatu, como propuestes dirixíes al Grupu Parlamentariu, programátiques, d’organización, proposiciones de llei o non de llei, preguntes parlamentaries…».
