«La reválida va suponer estrés pa los estudiantes, sobrecostos pa la Conseyería y sobrecarga pa los docentes», diz el voceru parllamentariu
«El conseyeru Genaro Alonso tien de tener valentía, tien que faer frente a la LOMCE y velar pol cumplimientu del derechu a la educación que vien recoyíu na Constitución». Esi ye’l llamamientu contra la conocida como ‘llei Wert’ que fixo esti mediudía’l voceru del Grupu Parllamentariu de Podemos Asturies demientres la so participación na asamblea social Llaboratoriu de la Conocencia, que se celebró nel Centru Municipal Integráu Xixón Sur, en Pumarín. Emilio León amosó’l refugu del partíu moráu a la reválida que prevé dicha llei, yá que «yeren posibles otres fórmules, como la del Gobiernu de Baleares, pa evitar que la reválida se convierta nun verdaderu problema na recta final del cursu». Dicha prueba «nun tien nengún tipu d’utilidá educativa, más bien al contrariu. Va suponer una situación d’estrés pa les y los estudiantes y pa les families, un sobrecostu pa les cuentes de la Conseyería y una sobrecarga pa unes plantiyes docentes que yá tán de por sí bastante amenorgaes».
El diputáu autonómicu incidió en que «la derogación de la LOMCE ye, ensin dulda, una de les prioridaes que tendría de tener cualquier executivu progresista» y amosó’l so enfotu en que «el futuru Gobiernu d’España impulse una llei muncho más integradora, una llei que cunte cola opinión de la comunidá educativa, y non una llei fecha de llombu de la ciudadanía, como ye la LOMCE».
Emilio León manifestó que «nun entendemos l’actitú del Gobiernu de la FSA y del conseyeru d’Educación y Cultura, que tán faciendo xusto lo contrario de lo que prometieron en campaña electoral. Dicíen que s’oponíen a la LOMCE y, sicasí, tán aplicándola a raxatabla. Creemos que’l PSOE asturianu, el PSOE del casu Marea’, tien una delda cola educación n’Asturies, porque los millones d’euros esviaos polos responsables d’esi casu sol Gobiernu de Vicente Álvarez Areces acarretaron retayos y barracones pa les y los estudiantes.
El voceru parllamentariu afirmó que «el derechu constitucional a la educación tien de ser consideráu prioritariu, en llugar d’amparase nuna lexislación como la LOMCE, que lo que busca ye la segregación y que nun pon la educación al serviciu de la ciudadanía».
