«Les cláusules sociales y l’apuesta pola economía social que defendimos na negociación presupuestaria ye una de les cuestiones clave p’afrontar esti tipu de situaciones. Ta claro que tien qu’haber un compromisu por parte de l’Alministración de contratar y sofitar a empreses d’economía social». Emilio León convocó nesos términos al Gobiernu asturianu na visita que llevó a cau esti miércoles a les instalaciones del centru especial d’empléuo xixonés APTA acompañáu por Lorena Gil, coportavoz parlamentaria, y por Nuria Rodríguez, conceyala de Xixón Sí Puede y coportavoz del Conseyu Ciudadanu de Podemos Asturies.

El portavoz parlamentariu y la conceyala Nuria Rodríguez reclamen al Gobiernu asturianu una solución urxente pal centru d’empléu xixonés

El portavoz parlamentariu de la formación morada, la diputada y la edil amosaron el so apoyu a la plantiya y a les families qu’atropa APTA, un centru nuna situación económica abegosa pol retrasu nos pagos pol Principáu. Nuria Rodríguez señaló que «dalgunes de les escusas que se dieron relacionándolo con cuestiones alministratives nun son entendibles nin asumibles. Hai que solucionar un problema que nun afecta solamente a 162 families, sinon tamién a les 50 persones que tan agora sometíes a un ERTE. El Gobiernu asturianu tien que dar salida a esta dificultá o a esti equívocu». La conceyala añadió que, no que cinca a la economía social, «nun val con recoyer oxetivos nun programa electoral nin con bones intenciones, sinon qu’hai que facelo efectivo y real. El compromisu cola economía social merez respuestes ceo».

Pela so parte, Emilio León recordó que «durante la negociación presupuestaria’l Gobiernu asturianu refugó la incorporación de cláusules sociales nos contratos y pliegos de l’Alministración, y eso tien muncha relación cola cuestión que tamos planteando güei n’APTA». Vinculó aquella negociación presupuestaria cola Llei de Créditu Estraordinariu que trata d’amenorgar los efectos de la prórroga al señalar, nun repasu per delles estayes, que «entós negáronse a incorporar midíes relacionaes cola vivienda. El Gobiernu tovía nun fizo nin una sola contratación en materia sanitaria y la llista d’espera nun meyora. En materia d’educación, planteamos la universalización progresiva y la gratuidá de les matrículas de cero a tres años, y naquel momentu negóse a ello’l Gobiernu socialista».

Asina les coses, agregó el portavoz parlamentariu, «taba claro que nun se daben les condiciones pal apoyu a los presupuestos. Agora tamos nun contestu distintu, delantre d’una Llei de Créditu Estraordinariu, y naide puede dicir que nun ficimos tolos esfuerzos pa llograr dalgo que ye fundamental, non solamente que se garantice esa reducción de la matrícula de les escueles de cero a tres años nun 50%, sinon sobre too qu’empiece a falase de la escuela infantil como un derechu». Remató diciendo qu’esa reducción de matrícula nun ye l’oxetivu cimeru del Grupu Parlamentariu de Podemos Asturies, de mou que «nos comprometemos a trabayar pa que dende 2019, na llegislatura nueva, la escuela de cero a tres seya pública y dafechu gratuita».