“Nun sé cuántos trabayadores cobren menos de 1.000 euros. Si m’avisaren, estudiaríalo y prepararíalo”. Esta foi la sorpresiva respuesta que Marcos Peña, presidente del Conseyu Económico y Social d’España (CES) -qu’ingresa mensualmente 4.500 € netos pola so condición d’altu cargu-, espresó esta mañana énte una entruga bien cenciella de la diputada de Podemos Asturies, Lorena Gil, na Comisión d’Industria y Empléu de la Xunta Xeneral, na que s’aldericó la Proposición de Llei del Principáu d’Asturies de supresión del Conseyu Económico y Social del Principáu d’Asturies. “L’unu per cientu de los representantes d’esti muerganismu públicu tienen condiciones que nun tienen nada que ver coles del 99 per cientu de los trabayadores. Nieve o llueva, estos sueldos nun van camudar. Y esto ye clave pa entender lo que ta asocediendo”, criticó de siguío la diputada de Podemos en referencia a los escesivos sueldos que los altos cargos de la CES perciben.
Na comisión, amás de Peña, comparecieron los representantes de CC OO, UXT y FADE d’Asturies. El diputáu de Podemos Asturies, Daniel Ripa, mientres la vez de fixación de posición manifestó que “tol mundu lo tien claro, menos el mesmu CES: ¿por qué nun puede ver lo que ta pasando? ¿Por qué nun pueden ver esi retrocesu na situación de los trabayadores?”. Y echó en cara a Nicolás Álvarez, presidente de la CES Asturies, que foi altu cargu del PSOE, que propunxera nuna entrevista’l 21 de Febreru de 2010, qu’había que producir más baratu p’ameyorar la competitividá. “Güei nun recordaba les sos palabres. Entrugámos-y poles reformes necesaries de la CES, el problema del techu de cristal, la infra-representación de dellos colectivos o la precariedá llaboral creciente del mercáu llaboral. En nada d’eso mos dio una respuesta convincente”, llamentó’l diputáu de Podemos. Coles mesmes, recordó qu’Álvarez ye unu de los de los altos cargos que más cobren del Principáu (64.000 euros). Nesi sentíu, Ripa amosó la so esmolición porque l’altu cargu de la CES n’Asturies, que debe comandar l’analís del mercáu llaboral, nun tenga opinión sobre nenguna de les anteriores cuestiones.
El representante de Podemos señaló a los grandes empresarios de ser los responsables “de meter al llobu ente les oveyes”. Y siguió criticando qu’en non poques ocasiones “el diálogu social convirtióse nel monólogu de la patronal”. Pa Ripa la resultancia de la concertación nun ye lo que queríen los sindicatos nin los trabayadores. “Esto va por entendese cola xente. Lo que se robla nun papel, condena a miles de families”.
Per otru llau, el diputáu de Podemos na Xunta Xeneral criticó que la CES ye un pequeñu eslabón d’una cadena que’l PP quier cargase porque entá nun consiguió entrar. “Denuncien les coses onde nun tán, pero cuando tán tien de denunciar la Fiscalía. Denuncien el cable, pero n’Aquagest tien de denuncialos la Fiscalía”.
Pa rematar la so intervención, Daniel Ripa apeló al espíritu de Marcelino Camacho o a Jeremy Corbin “líderes socialdemócrates que se daríen la mano por qu’Asturies volviera ser lo que foi”. Pal secretariu xeneral de Podemos -y diputáu- ye necesariu un sindicalismu que nun recule, que nun se llinde a xestionar la meyora inesorable de la precariedá, “sinón que caltenga’l so aliendu utópico tresformador y sía parte d’un cambéu social que ye necesariu”.
