Andrés Vilanova, diputáu pola circunscripción occidental, allegó a la gala solidaria que tuvo llugar ayeri tarde nel Auditoriu As Quintas, d’A Caridá, a beneficiu de les víctimes de les quemes que sufrió’l conceyu d’El Franco. Fízolo en representación del Grupu Parllamentariu de Podemos Asturies, que va donar parte del salariu de les sos diputaes y diputaos pa contribuyir, como un coleutivu más, na recaldación de fondos destinaos a los afectaos polos fueos del pasáu mes d’avientu y que va xestionar al traviés de concursu públicu d’ayudes el mesmu Ayuntamientu del conceyu.
La iniciativa de l’Alministración local, sofitada pol vecinderu y pol texíu asociativu de la zona, oldea cola pasividá del Gobiernu asturianu. Énte la grave situación que traviesa la nuesa comunidá autónoma, con incontables daños causaos pol fueu, Javier Fernández safa la so responsabilidá de presentar un nuevu proyeutu de presupuestos pa 2016 que prevea les necesidaes sobreveníes cola catástrofe.
La compensación económico y ambiental tienen de ser prioritaries ya inmediates. Dempués de cuatro años d’abandonu tres la quema del Valledor l’Executivu socialista tendría de presentar daqué más que promeses pa garantizar la restauración y la compensación de daños. Más allá de reparar les consecuencies, el mediu rural y forestal asturianu precisen un xiru de 180oC nes sos polítiques d’ordenación del territoriu y xestión forestal, yá que si siguen repitiéndose los esquemes en mediu rural, mediu ambiente y xestión del SEPA probablemente vamos venos empuestos a un cataclismu futuru.
