Nuria Rodríguez y Manuel Vicente, portavoz de Podemos Mieres, aconceayaron coles vecines de esta zona afectada pola calidá del aire y que refuguen la propuesta del Executivu de Barbón pa la quema de residuos na planta del conceyu Mieres.
Podemos Asturies refugó esti llunes los planes por parte d’Hunosa pa que na térmica de La Pereda (Mieres) queme residuos. Asina lo manifestaron a diputada Nuria Rodríguez y el portavoz de la formación morada en Mieres, Manuel Vicente, tras mantener un alcuentru colos vecinos y vecines del conceyu que, a les puertes de la térmica, volvieron denunciar problemas de salú que rellacionen cola térmica y mostraron la so oposición “frontal” a los planes de la hullera pública.
La diputada morada, señaló que “compartimos la preocupación de la xente de la zona y refugamos los planes del Gobiernu asturianu que quier dar el preste a la quema de residuos en La Pereda”. Nesi sentíu, Rodríguez apuntó que nesta zona d’Asturies “tenemos yá munchos problemas medioambientales, ye una zona mui castigada y hai munches carencias en cuantes a l’actividá industrial y la obligatoriedá d’establecer una serie de filtros y de procedimientos que protexan el medioambiente y qu’Hunosa nun ta faciendo”.
Pola so parte, la representate na Xunta Xeneral de Podemos Asturies apuntó directamente al Executivu asturianu que “nun ye quien a esixir a la hullera pública que cumpla cola política medioambiental necesaria”. Y alvirtió que dende la formación morada “tamos colos y coles vecines, sofitamos la so llucha y los sos derechos y nun nos vamos rendir”.
Otra manera, dende Podemos Mieres, el so portavoz Manuel Vicente apuntó que la incineradora “nun la queremos nin la xente de la zona, nin los grupos políticos”. Y confío en qu’esta situación “pueda resolvese cuanto primero”. Amás, recordó que si en Serín los vecinos y vecines “consiguieron paralo, equí en Mieres vamos facelo también”.
