Ye insostenible mantenelu nes condiciones d’anguaño, con un equipu directivu escesivu y sueldos superiores a 60.000 euros al añu

Dende’l Grupu Parlamentariu de Podemos Asturies consideramos que llegó’l momentu de plantease si hai que siguir contando col órganu consultivu autonómicu más caru na relación gastu por habitante, un datu que contrasta con unos presupuestos en crisis qu’impiden financiar recursos básicos. El Conseyu Consultivu del Principáu cuenta con un presupuestu pa 2018 de 1.493.715 euros, tres veces más de lo que cuesta, por exemplu, l’organismu consultivu d’Aragón. L’asturianu, según datos de 2014, tenía’l mayor gastu por habitante ente toles comunidaes autónomes que cuentan con esti órganu, siete veces más que’l gastu del d’Aragón y tamién siete veces más que’l coste por habitante que supón el Conseyu d’Estáu.

Sin embargu, en datos d’esi añu, el Conseyu Consultivu asturianu taba nel undécimu llugar en númberu de dictámenes emitíos por cada miembru del mesmu, per debaxo d’Aragón y mui per debaxo de los datos d’Extremadura, Galicia o Castiella y Lleón, onde los dictámenes por miembru cuadruplicaron los d’Asturies.

Nel órganu asturianu, el 89% del presupuestu destínase a gastos de personal, nuna plantiya qu’atropa seis altos cargos con salarios que van de los 62.650 euros al añu de quien ocupa la secretaría del Conseyu a los 64.343 euros que cobra’l presidente. Amás, de los cinco vocales con que cuenta’l Conseyu Consultivu tres son nomaos pol propiu Gobiernu asturianu, lo qu’asegura la mayoría absoluta del Executivu ente quienes han de xulgar y decidir el sentíu de los informes qu’ellabora esti ente. Esto diz poco en favor de la independencia necesaria d’esti órganu, consultivu pero mui trescendente.