El secretariu xeneral de Podemos Asturies y Laura Tuero, portavoz de Podemos-Equo en Xixón, aconceyaron con Iniciativa pol Asturianu
Daniel Ripa señaló, tres un alcuentru con representantes d’Iniciativa pol Asturianu esti xueves, que tien qu’empezar el procesu de diálogu pa una reforma estatutaria qu’oficialice l’asturianu y el gallego-asturiano, qu’asegure el fin de la discriminación llingüística. Ye’l momentu de comenzar un diálogu que remate cola oficialidá en 2021». El diputáu y secretariu xeneral de Podemos Asturies y la conceyala Laura Tuero, portavoz de Podemos-Equo nel Ayuntamientu de Xixón, acompañaos por Antón Caamaño y Pablo Martínez Testa, aconceyaron col colectivu que preside Iván Llera pa tratar dellos aspectos alredor de la situación llingüística en Xixón y n’Asturies.
P’algamar l’oxetivu de la oficialidá, Daniel Ripa pide «un diálogu ampliu, una reforma del Estatutu d’Autonomía qu’incorpore al mayor númberu posible de fuercies polítiques y de sensibilidaes ideolóxiques, col fin de que toles persones n’Asturies tengan los mesmos derechos, falen la llingua que falen. Cada vez ta más aceptao socialmente que la llingua ye un patrimoniu de toos y toes, al marxe de la ideoloxía». Considera amás que nun momentu como esti, coles amenaces derivaes del andanciu del coronavirus, «la oficialidá puede suponer un pegoyu pa la protección de derechos, pa la protección social y tamién pa la reactivación económica».
El secretariu xeneral de Podemos Asturies dixo tamién que «hai qu’acabar cola situación de precariedá y desprotección del profesoráu d’asturianu, que nun dispón d’una especialidá docente en llingua asturiana». Nesi sen, añadió, «ye una xera que-y ponemos al Gobiernu de coalición en Madrid, que ye’l que tien qu’acabar con una situación inxusta pal profesoráu d’asturianu».
Laura Tuero recordó que’l Plan de Normalización Llingüística de Xixón aprobóse nel plenu del pasáu mes d’agostu y que p’avanzar na aplicación de midíes «hai coses bien cencielles de facer. La web del Ayuntamientu camudóse va un añu pero desapaeció la versión n’asturianu, va un añu que dende la Oficina de Normalización Llingüística tán tornando conteníos al asturianu pero, naide sabe por qué, nun tán subiendo nada a la web municipal».
Comentó qu’Iniciativa pol Asturianu «reclamónos visibilidá del asturianu nes campañes del Ayuntamientu. Ponen como exemplu que la programación del Teatru Jovellanos facíase en castellanu pero al menos los meses taben n’asturianu, y agora nin siquiera eso: desapaeció dafechu l’asturianu. N’Emtusa y n’Emulsa tán faciéndose bien les coses, pero hai que meyorar dalgunos aspectos. Por exemplu, nuna de les últimes campañes d’Emulsa taba mal la torna, con castellanismos y espresiones que nun s’usen. Pídennos un mayor procuru en tolo que se faiga dende les empreses municipales».
