El secretariu xeneral de Podemos Asturies llamenta «el silenciu de Pablo Casado con una candidata que sigue ensin dar esplicaciones convincentes»
Daniel Ripa pidió esti xueves, al personase col abogáu Alberto Suárez en dependencies xudiciales ovetenses, que la Fiscalía investigue si la candidata del Partíu Popular a la Presidencia del Principado, Teresa Mallada, cometió un posible delitu de malversación y un posible delitu fiscal colos gastos que se-y atribuin cuando yera presidenta de la empresa estatal Hunosa. El secretariu xeneral de Podemos Asturies llamentó «el silenciu de Pablo Casado, qu’esti vienres vien a Asturies, con una candidata que sigue ensin dar esplicaciones convincentes».
El representante del partíu moráu señaló que «cumplimos la nuestra obligación democrática d’investigar, como ficimos a lo llargo de tola llexislatura, los presuntos delitos de saquéu, de corrupción, de mal usu de los fondos públicos». Recordó que «los casos d’El Musel, UXT, Gitpa, Marea o Hulla avanzaron cola nuestra participación y collaboración», y aseguró que Mallada «mintió en tres ocasiones: cuando dixo que nun taba imputada nel casu Hulla, cuando dixo que nunca la llamaran a declarar y cuando dixo que tolos gastos en Hunosa yeren correctos».
Daniel Ripa preguntóse «por qué Hunosa, una empresa pública, ensin pasar por nengún órganu de control, pagó-y un máster a la presidenta, que s’autorizaba ella mesma gastos de Presidencia». Tamién, dixo, «paeznos chocante que los gastos (en comida, xoyería, regalos…) esplicólos nunos casos pero n’otros non. Podría haber irregularidá, si eso fueron pagos n’especie pa incrementar el salariu de la qu’entós yera presidenta d’Hunosa».
