El secretariu xeneral de Podemos Asturies allegó a l’Audiencia Nacional pa recoyer documentación del casu d’El Musel en siendo almitíu OCAN como acusación popular
Metanes una notable espectación mediática, Daniel Ripa allegó esti mediudía a la see de l’Audiencia Nacional, en Madrid, pa recoyer la documentación sobre la investigación de los sobrecostos del puertu d’El Musel una vegada qu’el Observatoriu Ciudadanu Anticorrupción (OCAN), al que pertenez, foi aceptáu como acusación popular nel casu. A les puertes de l’Audiencia, el secretariu xeneral de Podemos Asturies y númberu trés de la candidatura autonómica pela circunscripción central, alvirtió de que «hai políticos qu’entamaron esta campaña electoral como candidatos y van acabala como imputaos».
Ripa informó de que «tamos equí porque s’aceutó la personación como acusación popular del OCAN, al que tamos venceyaos tantu’l candidatu a la Presidencia, Emilio León, como yo. L’ampliación d’El Musel costaba 500 millones d’euros y tuvo 200 millones de sobrecostu. La UE, al traviés d’un informe demoledor de la Oficina Europea de Llucha contra’l Fraude (OLAF), comunicó-y al Gobiernu español que se cometió fraude nos sobrecostos y pide la devolución del dineru. Considera qu’hubo connivencia ente políticos y empresarios p’amontar los costos de les obres. Tiróse a la mar un dineru que tendría de sirvir pa la creación de puestos de trabayu n’Asturies».
Denunció que nel conseyu d’alministración de l’Autoridá Portuaria había, mientres el periodu que ta siendo investigáu, «conseyeros socialistes del Gobiernu de Vicente Álvarez Areces y del actual de Javier Fernández» y dexó claro que vamos actuar como «azote de la corrupción non yá nes instituciones sinón tamién a nivel xudicial. Ye’l momentu d’un cambéu político y xudicial. Hai qu’acabar cola impunidá y cola omertá y escorrer a quien nos traxeron a la situación na que tamos».
Daniel Ripa personóse n’Audiencia Nacional acompañáu por Segundo González, ún de los miembros asturianos del Conseyu Ciudadanu estatal, y por Gloria Elizo, responsable del equipu llegal de Podemos, quien señaló que «creemos que la connivencia del restu de partíos cola actuación política hasta agora foi grande y el nuesu compromisu ye destruyir esa connivencia y actuar ellí onde podamos como persones de la cai».
