El diputáu y secretariu xeneral de Podemos Asturies considera que suprimir l’aforamientu «va fortalecer la democracia y la igualdá»

«Esta tien que ser la última llexislatura na qu’un casu de corrupción seya xulgáu por un tribunal especial, porque ye inaceptable, los parlamentos nun son llugares p’atrincherase». Con esa frase resumió Daniel Ripa ante los medios de comunicación l’oxetivu de la proposición de llei pa una reforma del Estatutu d’Autonomía empobinada a la supresión del aforamientu de diputaos y diputaes que rexistraron na Xunta Xeneral los grupos parlamentarios de Podemos Asturies y Ciudadanos. El diputáu y secretariu xeneral de la formación morada n’Asturies considera qu’esa midida «va fortalecer la democracia y la igualdá», y añade que «lo que tienen que facer el restu de grupos parlamentarios, especialmente’l PP y el PSOE, ye lo mesmo que tán faciendo n’otros parlamentos autonómicos. Diba ser difícil d’entender que lo que proponen a nivel estatal o lo qu’aprueben n’otros parlamentos nun lo respalden n’Asturies».

Daniel Ripa dixo qu’esta iniciativa conxunta de los grupos parlamentarios moráu y naranxa evidencia que «son posibles los acuerdos ente fuerces polítiques que somos diferentes, pero que nesti casu mantenemos l’oxetivu común d’avanzar en rexeneración democrática nesta llexislatura. Nun se puede dar la llexislatura por perdida, creemos que ye una bona oportunidá pa facer una reforma exprés, en poco más de dos meses, si hai voluntá pa ello». Defendió que «tolos ciudadanos y ciudadanes seyamos iguales ante la llei. Nun compartimos qu’haya una xusticia diferente pa los cargos públicos, nun compartimos qu’haya tribunales especiales que, a la hora de la verdá, suponen torgues pa investigar la llucha contra la corrupción o cualquier otra clase de delitos». Y recordó que «nel nuestru casu intentamos sistemáticamente renunciar a los aforamientos y al final decidimos trabayar na vía llexislativa, mediante la so supresión nel Estatutu d’Autonomía».

Pola so parte, Diana Sánchez, diputada del Grupu Parlamentariu de Ciudadanos, detalló que «el pasáu vienres, como acordáramos, rexistramos la proposición de llei pa la supresión de los aforamientos, lo qu’implica una reforma del Estatutu d’Autonomía. Pasamos la propuesta a los demás grupos parlamentarios y tuvimos la callada por rempuesta. Entendemos qu’agora la pelota ta nel so teyáu, cuando presentemos la proposición de llei a ver qué ye lo que van votar». Sobre los trámites que se tienen que siguir, informó de que «la resolución ha de pasar pola mesa de la cámara y en cuantes tea disponible vamos llevala al plenu. Si hai tiempu pa sustanciar los proyectos de llei que quier traer el Gobiernu al Parlamentu, creemos que tamién hai tiempu pa suprimir los aforamientos».