El secretariu xeneral recuerda que fueron propuestos pa esa distinción en 2013 y el Gobiernu socialista quixo más dexala desierta
Daniel Ripa anunció esti domingu, durante la so participación na manifestación pola República que tuvo llugar n’Uviéu, «el nuestru compromisu de qu’en setiembre d’esti añu la Medaya d’Oru d’Asturies va entregase a los guerrilleros asturianos que llucharon en Francia contra’l nazismu. Si gobernamos vamos concedé-yosla a títulu póstumu a los que yá morrieron y en persona a los pocos que tovía viven, como ye’l casu de Vicente García Riestra». El diputáu y secretariu xeneral de Podemos Asturies recordó qu’en 2011 «miles de persones y delles asociaciones memorialistes presentaron una solicitú al Gobiernu asturianu pa la concesión de la Medaya d’Oru a dos d’estes persones que llucharon poles llibertaes y que son héroes nacionales en Francia, pero’l Gobiernu autonómicu refugó esa propuesta y decidió entregala al que yera entós el xefe de la Casa Real».
El representante del partíu moráu llamentó qu’esi olvidu de los guerrilleros asturianos en Francia «nun se vio compensáu en nengún momentu del mandatu de Javier Fernández, un mandatu incompetente y triste en materia de memoria histórica, sinon más bien al contrario, porque en 2013 retomóse esa campaña ciudadana pa que se-yos concediera la Medaya d’Oru y el títulu de Fíos Predilectos d’Asturies pero l’Executivu socialista decidió dexar desiertes dambes distinciones esi añu». Na so opinión, «contrasta esa falta de sensibilidá hacia estos lluchadores poles libertaes de Francia y d’Europa coles simpatías que mostró’l Gobiernu de Fernández hacia la Corporación Masaveu, a la que sí concedió la Medaya d’Oru, en 2015».
Daniel Ripa considera «necesaria la reparación histórica y pagar la delda que tien Asturies con aquellos guerrilleros asturianos, persones que reciben honores en Francia y que n’Asturies nun tienen esi reconocimientu que merecen». Paez-y afayadizu esti xestu «nun momentu en qu’hai quienes pretenden facer volver la nuestra sociedad delles décades atrás. Delantre de quienes s’arguyecen de los crímenes de guerra de los sos güelos, nosotres y nosotros dicimos que la memoria, la xusticia y la reparación son más necesaries que nunca».
Los catorce guerrilleros asturianos a los que fai alusión son: Aladino Castro, Vicente García Riestra, José Antonio Alonso Alcalde (Comandante Robert), Felipe Matarranz (Comandante Lobo), Ángel Álvarez Fernández, Felipe Martín Pajares, Ángel Villar Tejón, Alfredo Rotella Morán, Ángeles Álvarez Fernández, Gregorio Cenitagoya, Aquilino Gómez, Joaquín Fernández, José Vitini y Cristino García Granda.
