El secretariu xeneral respuende a les declaraciones de Fernando Lastra sobre la midida de Podemos Asturies de tresporte a un euru
Daniel Ripa salió al pasu esti miércoles, durante la so participación na manifestación del Primeru de Mayu en Xixón, a les declaraciones del conseyeru Fernando Lastra nes qu’aseguraba que la midida de Podemos Asturies pa crear un billete de tresporte interurbanu a un euru na zona central diba suponer un preciu mayor que l’actual. El secretariu xeneral y númberu dos de la candidatura autonómica dixo que «a quien nun tuvo idees en cuarenta años pa sacar alantre Asturies nun puedo pidi-y que les tenga agora, pero sí quiero esixi-y que, en cuenta de tar pensando en marchar al Senáu pa xubilase con una pensión máxima, piense n’apoyar, o polo menos en nun torgar, midíes que van rellanzar económicamente Asturies».
Daniel Ripa espunxo que «al PSOE asturianu vémoslu inquietu por dalguna de les propuestes que planteamos, como la del tresporte públicu interurbanu semigratuitu na zona central, a un euru por trayectu, que diba crear unos 1.500 empleos directos y alredor de 2.500 indirectos». Añadió que «el señor Lastra, que lleva cuarenta años en primera llinia de la política, qu’empezó a trabayar na política y que se va xubilar esta llexislatura nel Senáu, onde lu punxo Adrián Barbón, probablemente desconoza, al cau de tantos años de viaxe con xofer, el preciu d’un billete d’autobús. Encaménto-y que pregunte a cualesquier estudiante que viaxa de Xixón a Uviéu cuánto paga pol billete».
El representante de la formación morada defendió que, «en tou casu, ye evidente que la propuesta de Podemos Asturies beneficia a toles persones usuaries de tresporte públicu, que va ser gratuitu pa colectivos con menos ingresos y que tamién va ser gratuitu ente localidaes cercanes como Candás y Xixón, por exemplu». Esta midida, amás, «fomenta una movilidá sostenible delantre del usu del tresporte particular», esplicó.
Daniel Ripa refirióse tamién al Partíu Popular asturianu, «al que vemos mui nerviosu dempués d’un descalabru electoral históricu’l domingu pasáu. La señora Teresa Mallada diz que quier un alderique col PSOE; pues nosotres y nosotros tamos dispuestos a aldericar con ella cuando quiera, y asina puede enseñanos la información que tenga sobre’l casu Hunosa, los másteres y los diversos gastos, o sobre’l casu Hulla y los terrenos que dio de pasu l’Ayuntamientu d’Ayer cuando ella yera conceyala».
