El mundu la cultura traviesa un periodu de d’estrema dificultá por mor de les cancelaciones de centenares d’actuaciones y conciertos nel que ye’l momentu de mayor actividá del añu pal sector. Munchos de los grandes festivales de música y teatru queden anulaos, colo qu’esto supón pal texíu de la cultura en vivo. Los escasos grupos y compañíes qu’actúen tienen de poner en marcha protocolos de seguridá bien rigurosos, tal y como desixen les autoridaes sanitaries, y tán faciéndolo con tol procuru y responsabilidá, dando un exemplu de civismu, solidaridá y respetu.
Sicasí, les redes y los medios de comunicación vienen d’amosanos cómo’l pasáu 2 d’agostu una plaza toros taba a arreventar en Huelva o cómo nun conciertu dientro del festival d’una empresa aseguradora s’incumplíen deliberadamente les normes de seguridá establecíes poles autoridaes sanitaries pa evitar l’espardimientu del andanciu de la covid-19. Y esto, como nun podía ser d’otra manera, xeneró una fonda indignación ciudadana.
Dende la Secretaría de Cultura de Podemos queremos recalcar, d’igual manera que lo vienen faciendo munches y munchos artistes, qu’estos eventos son esceiciones y non la norma. Que la cultura ye segura, y amás forma parte del nuesu motor productivu. Hemos recordar que, según l’Anuariu d’Estadístiques Culturales, espublizáu pol Ministeriu de Cultura, el sector cultural aportó un 3,2% al PIB nel últimu exerciciu, y qu’ente les motivaciones del turismu nel 2019, cuasique’l 40% yera pola axenda cultural del conxuntu l’Estáu, como señala CulturaBase.
Amás, recordamos a toles alministraciones autonómiques y llocales que ye parte del so llabor la puesta en práctica de toles normes empobinaes a evitar el contaxu de la covid-19, y qu’estes se desendolquen cola máxima tresparencia, equidá y rigor, ensin esceiciones. Y desiximos a eses mesmes autoridaes que faciliten en tolo posible la celebración d’espectáculos y actividaes culturales, respetando les midíes de seguridá diseñaes, y cumpliendo con tresparencia les condiciones de contratación y remuneración d’artistes, compañíes, grupos y técnicos. Porque’l so caltenimientu ye fundamental énte’l perxuiciu gravísimu que tán sufriendo anguaño artistes y trabayadores de la cultura en toles sos facetes, porque nun falamos namás d’intérpretes, sinón tamién del personal técnicu que fai posible un espectáculu.
Nel trescursu d’esta pandemia, los y les trabayadores de la cultura demostraron ser solidaries y xeneroses, compartieron el so trabayu pa facer más llevaderu’l confinamientu y tola ciudadanía vimos la importancia que tien la cultura nes nueses vides. La recuperación del so valor social ye prioritaria pa construyir una sociedá más avanzada y que mire hacia’l futuru. Vamos defender a los sos profesionales reconociéndo-yos los sos derechos, dignificando la so xera.
#LaCulturaYeSegura #EnsinTécnicosNunHaiCultura
#LaCulturaEsSegura #SinTécnicosNoHayCultura
Secretaría de Cultura de Podemos
