Iván G. Fernández

El diputáu va preguntar al conseyeru «por qué nun se habiliten los recursos que necesita’l colexu pa dar cabida a tola demanda d’Infantil»

La esclusión de cuatro neñas y neños del colexu d’Educación Infantil y Primaria El Pascón por falta de plaza «fae desconfiar del Plan del Suroccidente. Ye vergonzoso que publiciten el Plan cuando cuestiones tán importantes las deixan olvidadas», afirma Andrés Fernández Vilanova, que denuncia que «la Conseyería d’Educación vuelve a negar unidades docentes nel mediu rural, deixando fuera varias matrículas nel colexu de Tinéu». El diputáu del Grupu Parlamentariu de Podemos Asturies va preguntar al conseyeru d’Educación, Genaro Alonso, nel prósimu plenu del Parlamentu asturianu «por qué nun se habilitan los recursos que necesita’l El Pascón pa dar cabida a tola demanda de matrícula n’Educación Infantil. Confiamos en que rectifique; si non, vamos siguir insistiendo xunto colas familias».

El parlamentariu pola circunscripción occidental recuerda que «las reclamaciones de las familias fueron ignoradas pol director xeneral de Planificación, Roberto Suárez Malagón, qu’insiste n’imponer un criteriu esclusivamente economicista, ensin tener en cuenta el papel del sistema educativu como soporte demográficu». Na so opinión, «si queremos mantener la población nas vil.las ya nel campu, la educación tien que conceptuase como una inversión, ya nun podemos escatimar en recursos nin permitinos que haiga familias que queden escluidas».

Dao que la resolución nun ye definitiva, Andrés Vilanova asegura que «la Conseyería d’Educación taría a tiempu de dar la vuelta a esta inxusticia antes de que se consolide».