El diputáu de Podemos Asturies propón a la Conseyería «crear 49 nueves places d’equipu pa ofrecer en cuenta de les del SAC»

«Nun val de nada defender de pallabra l’Atención Primaria si dempués se dinamita la Ufierta Pública d’Empléu (UPE), que ye la ferramienta más eficaz que tenemos pa reabastecer de profesionales al sistema sanitariu», diz Andrés Fernández Vilanova, que darréu señala que «ensin manes pa trabayar, poco vamos avanzar». El diputáu asegura que «en Podemos Asturies creemos qu’esiste una solución pal conflictu xeneráu pola Conseyería alredor de la UPE d’Atención Primaria, y llevamos delles selmanes insistiendo pa que’l conseyeru de Sanidá rectifique».

El diputáu concreta que «la propuesta que-y treslladamos como alternativa a la so maniobra ye la crear 49 nueves places d’equipu d’Atención Primaria pa ofrecer en cuenta de les del SAC nel procesu de la UPE más movilidá». Esplica que «delantre de la negativa, o la cerrazón, de la Conseyería a aceptar esta propuesta vímonos na obligación de rexistrar una moción de reprobación, que tamos en disposición de retirar en casu de que diera marcha atrás nos sos planes y aceptara’l nuestru planteamientu».

Andrés Vilanova conclúi diciendo que «esta maniobra de la Conseyería non solo ye una llocura, sinon una llocura innecesaria, porque hai una alternativa, que ye crear eses 49 places pa nun tener que recurrir a les del SAC». Colo cual, dexa claro, «ta nes manes de la Conseyería evitar la so reprobación y, sobre too, evitar el desbaraxuste y el caos n’Atención Primaria».