«Les direcciones de personal del Sespa tán saltándose la llegalidá en materia de seguridá llaboral y de permisos en relación cola maternidá, que son fundamentales pa garantizar la igualdá efectiva ente muyeres y homes na plantiya», alvierte Andrés Fernández Vilanova. El diputáu rexistró na Xunta Xeneral una pregunta urxente pa saber «qué actuaciones va poner en práctica la Conseyería de Sanidá ante la denuncia pública por parte de la Plataforma de Trabayadores del Sespa de que nel HUCA se ta coaccionando a trabayadores d’Enfermería con empeoramientu de condiciones de trabayu pa disuadir de solicitar reducciones de xornada por maternidá».

El parlamentariu responsable d’asuntos de salú nel Grupu Parlamentariu de Podemos Asturies diz que «si ye cierto se trataríase d’una situación bien grave, un atentáu contra la igualdá de les muyeres, doblemente dañín por provenir d’una Alministración pública qu’habría de protexer los sos drechos». Esplica que cuando una persona pide acoyese a una reducción de xornada «tien qu’otorgase ensin amenorgar los derechos adquiríos por esa persona». Nesi sen, añade, l’Hospital Universitariu Clínicu d’Asturies (HUCA) y el Serviciu de Salú del Principáu d’Asturies (SESPA) «quieren facenos creer que respeten los permisos de reducción de xornada, pero nun ye verdá porque pretenden dalos ensin destinar recursos a ello, ensin contratar más personal. Pa cumplir cola llexislación y respetar los derechos llaborales de les trabayadores, al HUCA y al SESPA nun-yos queda otra que contratar personal que tape los furacos de los permisos de maternidad».

Andrés Vilanova llamenta, no que cinca a les polítiques d’igualdá del Executivu socialista, que «mientres el Gobiernu de Javier Fernández siga permitiendo y amparando estos abusos llaborales sobre les muyeres va dar lo mesmo cuántes pancartes garren y cuantes declaraciones institucionales suscriban, porque les muyeres a pie de cai van saber con quién pueden cuntar y con quién non»