El diputáu pide a la Conseyería de Sanidá qu’esplique «el porqué d’un atascu burocráticu que nun se produz n’otres comunidaes»

Andrés Fernández Vilanova recordó esti miércoles que «va cinco meses yá-y planteamos al conseyeru de Sanidá que pa crear la bolsa de demandantes d’empléu y que fuera operativa, con capacidá de cubrir ausencies y vacantes, yera necesario disponer d’un sistema de baremación áxil». Agora, añadió, «tamos comprobando la mala xestión d’esa bolsa, l’embudu alministrativu nel procesu de baremación que ta impidiendo la incorporación afluida de profesionales y esto, amás de dir en perxuiciu del conxuntu de trabayadores del sistema sanitariu porque-yos torga l’accesu, dificulta cubrir puestos en delles especialidaes y ocasiona un aumentu de les llistes d’espera».

El diputáu del Grupu Parlamentariu de Podemos Asturies dixo qu’esi problema «ponse de manifiestu na situación que se ta viviendo en Traumatoloxía o cola contestación escrita, va poco, de la xefatura de serviciu de Radioloxía del HUCA a una reclamación sobre’l retrasu nes mamografíes». En dambos casos «los servicios espliquen que si nun se da abastu na asistencia a pacientes ye pol agotamientu de la bolsa de contratación».

Polo tanto, aseguró, «urxe una rempuesta de la Conseyería de Sanidá pa esplicar el porqué d’esti atascu burocráticu na bolsa que nun se produz n’otres comunidades. Van tener que dicinos si se va contratar más personal alministrativu pa resolver esi embudu o si tán previstes otres fórmules de contratación en casu d’agotamientu de la bolsa». En cualesquier casu, conclúi Andrés Vilanova, «habríen de pensar nuna alternativa, porque nun podemos permitinos estes esperes en servicios como Traumatoloxía o Radioloxía».